怪事年年有，今年特別多。中文大學心臟科教授余卓文被「封刀」事件搞到滿城風雨，公說公有理，婆說婆有理，雙方各執一詞，誰是誰非，真係審死官，睇嚟惟有等獨立委員會嘅調查結果咯。但無論點都好，呢場風波起碼證明咗一樣嘢，就係醫管局管理混亂囉。
講到管理混亂，今次只係小兒科咋。呢，護士協會日前調查發現，公立醫院近三成受訪護士計劃未來半年離職或退休，工作壓力係考慮離職嘅最大因素，當中以港島西及九龍西聯網最嚴重，分別有三成八及三成人表示會離職；以專科分類，兒科及骨科情況最嚴峻，分別有五成及四成半護士考慮離職。調查仲顯示，逾五成護士指過去半年部門空缺沒有或僅部分獲填補，新界東聯網最離譜，有兩成五護士指空缺完全冇填補。
講到呢度，大家應該知道護士無心戀戰、爭相逃亡嘅真正原因。即係咁，公立醫院前線人手不足，本來已經係十個煲七個蓋，依家走吓一個又一個，而空缺又得唔到填補，變成十個煲五個蓋，留低嘅護士工作壓力進一步增加，個個疲於奔命，做到有氣冇碇抖，想唔逃亡都幾難。護士工作壓力究竟有幾大？調查發現，夜更護士由去年每人平均照顧廿一名病人，惡化到今年照顧廿四名病人，遠超每人照顧四至六名病人嘅國際標準，仲慘過落後國家，問你怕未！
護士協會係咁講嘅，未來三至五年係護士退休潮，人手短缺情況將會更加嚴峻，所以咯喎，該會要求醫管局一方面暫緩推出新服務，紓緩前線工作壓力，另一方面增聘人手及改善薪酬待遇，提供更多晉升機會，以挽留人才。其實計功夫茶話齋，以暫緩推出新服務嚟紓緩前線工作壓力，既治唔到標，更治唔到本，根本唔係辦法，要挽留護士，激勵士氣，始終要從改善工作環境及工作條件着手，簡單啲講，除咗要大量增聘人手，亦要適當改善待遇。近年來，醫管局話就話一直聘請緊護士，可惜請一個走兩個，補唔到窿不特止，仲愈補愈大鑊添。
講到底，公立醫院千瘡百孔，七國咁亂，醫管局管理不善，絕對難辭其咎。管理層架構臃腫，肥上瘦下，佔用大量資源，搞到前線人手不足，士無鬥志，有乜法子唔爭相逃亡吖。嗱，港府自己都知道大鑊，較早前煞有介事成立督導委員會，話要全面檢討醫管局運作喎。不過，功夫茶就唔係咁樂觀嘞，港產官僚做嘢一向雷大雨小，虎頭蛇尾，今次究竟係真檢討，定係敷衍民意，好快就知答案，大家不妨拭目以待。