通訊事務管理局重罰亞視兼下令執行董事盛品儒聽日前離職，商務及經濟發展局局長蘇錦樑（Greg蘇）更講到明，盛品儒無論「喬裝」成董事抑或行政人員，總之職務對亞視有控制權嘅統統唔做得，限期前唔執包袱的話，就等通訊局罰錢甚至「釘牌」喎。政府咁大個「大信封」擺喺盛品儒面前，唔知市民會唔會寧願盛品儒死撐唔辭職博「釘牌」，咁咪仲皆大歡喜？至於亞視日前周圍唱話要上訴就遲遲冇動作，相信Greg蘇都好似香港市民咁等到唔耐煩，希望亞視點都有個交代，唔好要市民估估吓啦！
