立法會議員陳志全（慢必）尋日喺社交網站留言話，自己喺銅鑼灣上的士，要去紅磡，即係之間只相隔咗一條紅磡海底隧道，點知被司機問佢想行邊條隧道。慢必即時留言，話司機哥哥好進取，呢句說話真係可圈可點。對於司機哥哥嘅做法，慢必嘅網友就有唔同嘅意見同睇法。
有網民留言同慢必講，話司機哥哥可能當佢係內地旅客，又有網民話紅磡過海隧道可以好塞車，特別係有交通事故嘅時候，所以司機肯問多句都係好嘅。仲有啲網民建議慢必同司機哥哥講，話要行大老山隧道、時光隧道，以及行人隧道等等，認真搞笑。不過，相信最氹得慢必開心嗰個留言，一定係話司機哥哥見慢必靚仔，想撩佢吹水喎。
不過，慢必究竟去紅磡火車站做乜呢？慢必幾小時後，再分享咗幅相，謎底原來係去咗廣州，睇達明一派演唱會呀！