政情：港版南丁格爾 國際表揚
再有港版南丁格爾喺國際護理界吐氣揚眉，醫管局前總護理行政經理、現任臨時香港護理專科學院院長林崇綏日前獲紅十字國際委員會頒發第四十四屆南丁格爾獎章，表揚佢喺護理工作嘅卓越成就。呢個榮譽相當巴閉，今屆全球只有卅二個得獎者，佢係繼馮玉娟之後第二位獲此殊榮嘅港人護理工作者添。
實習第一日要「打包」
林崇綏尋日大談佢四十三年嘅護理生涯，講番起舊時前線工作，記憶猶新。佢喺伊利沙伯護士學校出身，第一日去醫院實習就已經臨危受命，接受「打包」、即係處理遺體嘅挑戰，仲要單人匹馬上陣！當時毫無經驗嘅佢惟有一路祈禱，一路諗番起上堂學過嘅嘢。
令林崇綏難忘嘅仲有十年前沙士襲港，當時佢喺總指揮中心統籌前線人手安排同埋開設護理特訓課程，以軍師嘅身份喺背後領航，陪伴一眾前線護理人員走過艱難一戰。近年佢積極籌辦臨時護專，絕對係推動護士專科化嘅先驅。