中環出更：呂鈞堯添孖女 分唔出姊妹

前保良局主席呂鈞堯（Quincy）日前再度添丁，韓籍太太Miyoung上星期五凌晨誕下一對孖女，兩姊妹無論輪廓、笑容，都十足孖公仔，就連Quincy一時間都分唔出，邊個係大孖，邊個係細孖。
擁有一個兒子嘅呂鈞堯（中），同太太Miyoung（右）喜獲一對孖女。（資料圖片）
擁有一個兒子嘅呂鈞堯（中），同太太Miyoung（右）喜獲一對孖女。（資料圖片）

產房播韓文歌

太太凌晨兩點幾作動，比預產期提早兩周，嚇到Quincy漏夜同太太飛車直奔醫院，仲入埋產房。主診醫生知道Miyoung係韓國人，播歌緩和氣氛時，專登揀首韓文歌，唔通係「江南Style」？Quincy話，節奏咁激，唔啱生仔聽噃。醫生手勢好熟練，笑言一首歌後，孖女就出世，果然講得出做得到，首韓文歌都未播完，孖女就呱呱墮地，Quincy開心到拿拿聲剪臍帶，一對孖女分別各重約四點六磅，白皙皮膚似足媽咪，可愛嘅笑容就似爸爸。

一對孖女長得精靈可愛，左是大孖，右是細孖。（被訪者提供）
  • 一對孖女長得精靈可愛，左是大孖，右是細孖。（被訪者提供）

點分大細孖？Quincy笑言有啲混淆，仲未分到：「大孖塊面好似圓啲，細孖塊面尖啲。」已有一個囝囝嘅佢，依家湊埋呢對孖女，三個夠晒數嘞，唔再生。改乜名好？Quincy就話由太太及家人決定，事關大仔個名係佢改嘅，今次畀太太話晒事喎。

卓妮

第一手消息請下載on.cc東方互動iPhone/iPad/Android/Windows Phone Apps