俗語話，年紀大，機器壞。計年紀，港府唔算大，不過施政機器早就生銹甩牙，搞到安老政策天殘地缺，好多長者唔係輪候唔到資助宿位棲身，就係輪候唔到護理服務照顧，晚景淒涼。嗱，官老爺可能被公公婆婆打小人打得多，終於知衰補鑊，由下個月起推出「長者社區照顧服務券試驗計劃」喎。
所謂長者社區照顧服務券，簡單嚟講，即係資助長者使用私營日間中心或家居照顧服務，資助額最高每月五千八百元，申請人必須身體機能評為中度缺損，以及正在輪候資助社區或住宿照顧。社署話喎，首階段會發出三千份邀請，暫時有二百四十名長者表示有興趣參與，目標首兩年派出一千二百張服務券咁話。
功夫茶係唔係聽錯呀？兩年先至一千二百個名額，相對於近三萬名輪候緊資助宿位嘅公公婆婆，連杯水車薪都講唔上，咁算得係乜嘢德政呀？係人都知，好多老人家行動不便，孤苦伶仃，日常生活好需要人哋照顧，每年有五千幾人輪候資助宿位期間含恨而逝，港府依家推出服務券敷衍民意，究竟有幾多誠意，唔使功夫茶講，大家都知道答案喇。唔怪得服務券反應冷淡，好多公公婆婆根本冇興趣。
即係咁，服務券計劃本來唔係話唔好，港府做唔到老有所養，老有所依啫，至少能夠老有所幫，起居飲食有人照顧，呢樣都算係聊勝於無。問題係受惠人數少得咁可憐，小恩小惠，有措施即係冇措施啫。話時話，港府唔係無錢吖嘛，庫房年年水浸，安老卻斤斤計較，港產官僚想唔認不孝都唔得啦。
所以話，官老爺將服務券計劃吹到天花龍鳳，乜嘢「錢跟人走」，乜嘢「居家安老」，其實統統都係吹水唔抹嘴。計功夫茶話齋，如果當局真係想畀老人家安享晚年，過番啲有尊嚴嘅生活，最實際嘅做法就係大刀闊斧增加資助宿位。開講都有話啦，安身立命，如果老人家連最基本嘅居住問題都解決唔到，當局推出再多嘅小修小補措施都係嘥氣嘅咋！
咪話功夫茶以君子之心度小人之腹吖，港產官僚推出服務券，名為服務長者，實係服務自己，想為推卸安老責任搵藉口。增加安老宿位無心無力，咪求其推啲補鑊措施出嚟虛應民意，拖得就拖囉。喂，安老宿位短缺唔係一朝一夕嘅事，而係老掉牙嘅問題，你哋究竟幾時至肯改善呀？
總而言之，服務券杯水車薪，增宿位不能再拖。長者孤苦伶仃無人照顧固然可憐，風燭殘年宿位難求更加痛苦，唔該官老爺唔好再推卸責任嘞，須知人在做，天在看，虐待老人家，小心畀天收呀！