政情：議員粗鄙發言考傳譯員
「我一估就估到史篤城，掉轉嚟讀就係『成篤屎』」、「梁生，你滷味唔食食叉燒，敬酒唔飲飲罰酒就得o架嗱？」呢兩句極具創意，但又極為刁鑽嘅議員發言，原來都難唔到立法會一班專業傳譯員。話說立法會聘用嘅手語同外語傳譯公司，早前合約期滿要商討續約，立法會行政管理委員會為傳譯公司進行測試評估時，就用咗上述兩句議員發言來考核傳譯員，結果順利過關，獲批再續約兩年。
愛玩食字諧音博出位
現時立法會幾乎所有公開會議，都有安排即時嘅英文同普通話傳譯，每逢星期三舉行嘅大會更有手語傳譯，但係要好傳神咁傳譯議員嘅精警發言，絕對唔係一件容易事。事關近年愈來愈多議員鍾意透過玩食字同玩諧音嚟博出位，例如「長毛」梁國雄就試過出燈謎，以某支英超球隊「史篤城」嚟估「本港最有權力物體」，暗踩政府係「成篤屎」，咁究竟「成篤屎」嘅普通話同英文點樣傳譯先係最傳神呢？
我哋請教過一啲對文化研究有認識嘅學者，佢話「一篤屎」嘅普通話，可以傳譯為「一泡屎」，至於英文方面就可譯為「a piece of shit」。不過，網上亦有人認為，「a piece of shit」係侮辱用語，將之翻譯為「廢人」或「賤人」，所以有好多唔同嘅理解，難怪立法會請傳譯員時都要小心考核過先喇。至於「一篤屎」嘅手語係點做，就比較難喺呢度形容出來，大家不妨留意吓立法會開會啲手語傳譯員點做。
遲啲料譯埋網上術語
除咗刁鑽發言外，因為議員唔可以喺會議上公然講粗口，但就有議員開創大玩諧音粗口，用普通話鬧班高薪厚祿嘅庸官很「不該」，搞到市民變成「poor guy」，亦隨時考起一眾專業傳譯員。據聞立法會秘書處轄下嘅翻譯及傳譯部，正計劃搜集過往議員嘅有趣發言，再製成一本詞彙集，以供班傳譯員日後參考。所以話呢，依家做傳譯員真係唔易做，遲啲分分鐘要譯埋互聯網常用嘅術語都未定。