中環出更：雙龍寺打坐 陳柏楠忘憂
金股匯市場近期大上大落，少啲膽汁都頂唔住。香港證券商協會會董陳柏楠（Tom），月前就去泰北山上「雙龍寺」抖抖，當地佛寺金碧輝煌，佢本來諗住參觀吓，誰知行到寺內偏廳一角，深深被靈氣吸引，突然好想坐低打坐，竟然一坐就坐足四個鐘頭。
持續4句鐘 如老僧入定
篤信佛教多年嘅Tom，十七年前喺台灣學習禪修打坐，佢話金融工作爭分奪秒，踏進公司大門一刻就進入作戰狀態，時刻要打醒十二分精神。今次在泰北嘅打坐奇遇，心情豁然開朗，同行朋友都驚訝，佢竟然好似老僧入定，一坐就四個鐘頭，期間動也不動。
Tom話，專注打坐一刻，忘卻煩惱，回復真我：「我睜開眼一刻，根本唔覺坐咗幾個鐘。」「叉電」四小時後，思路更清晰：「打坐令我認清自己，珍惜當下擁有的東西，卻唔會執着於成敗得失，人生活得更自在。」
卓妮