中環出更：活動着錯裙小吉拒「跪低」
為期五日嘅國際青少年繪畫比賽尋日喺尖沙咀文化中心煞科，壓軸環節係由八十名來自世界各地嘅小畫家及逾千名市民，攜手畫出長達千米嘅「全球最長填色畫」，喺比賽籌委會主席方黃吉雯（小吉）、青年事務委員會主席陳振彬、中華電力企業發展總裁莊偉茵（Quince）等見證下，成功刷新健力士世界紀錄。可能小吉親自籌劃今次創舉，所以致詞時都有啲緊張，將支持單位之一嘅「國泰城」，講錯做「泰國城」。
小畫家面前燒鬚
活動中仲發生咗段小插曲，一向好有品味嘅小吉，每次出席公開活動都衣着得體，但尋日竟然「老貓燒鬚」。話說佢身穿一條粉紅色及膝連身裙主持「開筆禮」，活動司儀示意一眾嘉賓跪喺地上，為超長畫布率先掃上色彩。在場咁多位嘉賓都係着褲，聞言即輕鬆單膝跪下，唯獨着裙嘅小吉不知所措，撳住條裙想踎低又怕走光，掙扎咗幾分鐘後，最終為保儀態都係堅持企喺度，將油掃交畀身旁嘅外籍少女代勞。
民政事務局署理局長許曉暉（Florence）就好盡力填色，佢同比賽大使「天才小畫家」劉見之，即係青少年兒童畫家培育基金創辦人劉浩昌嘅囝囝同一組，見之出晒名有繪畫天分，佢睇到Florence拎住把油掃、望住幅畫不知從何入手，於是從旁提示對方，Florence欣然受教。Quince今次係第二度見證健力士紀錄誕生，心情興奮，佢話自畢業之後，都冇再拎過畫筆，今次可乘機重拾做學生嘅情懷喎。
卓妮