喔噢，土瓜灣曾經試過冧樓死人，莫非有機會歷史重演？上次冧樓現場係馬頭圍道，冧到土崩瓦解，結果死傷枕藉，家陣土瓜灣又有一幢危樓，位置係啟明街五十一號。
件事係咁嘅，屋宇署上星期認為啟明街一幢五十六年歷史嘅舊式唐樓「完全危險」，理由係經過僭建嘅懸臂式平板露台結構狀況惡劣，露台有下塌嘅可能，所以打算向法庭申請封閉令，估計至少封樓五個月，以便清拆露台以及全面勘察。
如果要封樓，涉及十二個單位嘅十幾戶居民當然要搬出啦，問題係政府冇提供周詳嘅安排，臨急臨忙七日之內你叫居民搬去邊呢？所以咯喎，有八十歲老婆婆情緒激動跪地嚎哭，又有經營洗衣店嘅負責人怒斥官僚冇提供任何考慮方案。
事件經過一星期擾擾攘攘，屋宇署話拆又唔拆，尋日拋出一個所謂嘅讓步方案。呢一個方案係咁嘅，先圍封有危險嘅露台以樁躉加固，再勘察主樓結構，取代原本建議嘅「拆露台、後驗樓」嘅安排。之不過咁，即使表面上係讓步，露台或者會保留，但係居民仍然要暫時遷出所住嘅單位，拆唔拆都冇乜分別。
其實計功夫茶話齋，若然一幢超過半世紀已經甩皮甩骨嘅舊樓真係有下塌嘅危險，修修補補始終唔係辦法，最好就係拆卸重建，一了百了，畢竟冇人願意再見到類似馬頭圍道嘅冧樓慘劇。問題係點解官老爺唔可以安排得比較周詳呢？點解唔可以做到急民之所急呢？家陣最急切要解決嘅係安置居民，原本話七日之內要搬已經強人所難啦，事到如今要搬走嘅時間只剩低一至兩日，倉促成咁唔通你叫人哋走去天橋底瞓街咩！
講真吖，居民都明白所住舊樓存在嘅風險，否則日前都唔會有四十幾名街坊走去同市建局開會，爭取優先重建啟明街廿一號至五十一號七個街號嘅舊樓。協助街坊嘅立法會議員形容，局方反應正面，大家都認同「該區最好重建」。而市建局嘅官方態度係咁講嘅，受到法例所限，現階段不會作出明確表示，講咗等於冇講。
即係咁，舊樓清拆重建原則上冇乜人會反對，點都好過任由危樓演變成冧樓吖。令人睇唔過眼嘅係，特區政府協助居民搬出危樓嘅安排乏善足陳囉，搞到人哋無家可歸點算好呢？官老爺懶理危樓居民嘅安置困難，一聲令下話搬就要搬，而且欠缺妥善安排，完全不可接受！
嗱，功夫茶有一個建議，若然危樓居民唔知搬去邊，試下去禮賓府門外紮營，話唔定受過擾人清夢煎熬嘅禮賓府主人會好快想出解決辦法。