政情：公民講場：堆填區滲漏黃陸鬥潛水

本報早在六月份踢爆打鼓嶺堆填區污水池滲漏毒水，令附近平原河出現橙色沉積物。危害市民健康咁大件事，環保署隔兩個月先公布滲漏事故，最離譜係只派出環保署助理署長王德威交代，但環境局局長黃錦星（星星）同副局長陸恭蕙就無晒影，星星就話休假啫，副手陸恭蕙做乜「潛水」呢？如果連堆填區滲漏問題都搞唔好，到十月政府要重推三個堆填區擴建方案時，阻力自然有增無減，試問市民點會有信心支持擴建堆填區呢？無民意支持，建制派想撐都撐唔落啦，莫非黃錦星最後又搵「奶媽」政務司司長林鄭月娥出嚟拆彈？