政情：醫局女掌櫃下月退休
好多人都覺得女性精打細算，搵佢地管住盤數最放心，原來成立廿二年嘅醫院管理局都係由一個「女掌櫃」掌握財政大權，佢就係財務總監謝秀玲（Nancy）。Nancy係醫管局開局元老，一直服務至今，但相聚有時、離別有時，佢下月就會退休，結束多年來管數生涯。
管數22年 難忘借錢出糧
Nancy尋日同傳媒茶敍告別，分享多年管數生涯，最難忘要數○二年醫管局削減開支，同埋今年財政預算案「被拉布」，搞到成班同事差啲無糧出。大拿拿廿八億元，Nancy話嗰段時間都幾驚險，日日都諗Plan B應變，廿二年以來首次搵銀行借錢出糧，仲叫人畀最低息，又試過搵藥廠幫手通容遲啲找數，呢個掌櫃提醒繼任人要有多啲儲備以防萬一。
不過，撳計數機好掂嘅Nancy，竟然被吸塵機考起，話款式同功能多多，都唔知買邊部好，大嘆女人唔易做，所以退休後要學吓做真女人喎。