政情：筲箕剪唔成 白鴿（火羅）爆
有學者倡議佔領中環行動（佔中）搶晒風頭，民主黨（白鴿黨）最近就諗到計，話只要政府推行真普選，咁就唔使佔中喇。該黨尋日就去中環派傳單，解釋「好好哋……做乜要佔中？」仲帶埋個寫住「篩選」嘅筲箕，諗住「引刀成一快」，當係剪爛個篩選機制，點知到落手去剪嗰吓，先發覺原來唔係咁容易。
話說乳鴿羅健熙一開始只係沿筲箕外圍剪咗一個圈，只係將個大筲箕剪成細筲箕，明顯剪唔入肉，所以要由老鴿蔡耀昌出手，點知都係剪唔到「篩選」兩個字，最後立法會議員黃碧雲就出盡力剪，都只係剪到個「篩」字，最後都係剪唔爛個堅固嘅筲箕，真係出師不利，反映佢哋冇做好事前準備，仲話學人爭取普選喎。
羅健熙透露，該黨下月起會喺全港五個區搞研討會，首場喺九月六號晚，去番佢區議會鴨脷洲選區舉行，屆時佔中三子會有代表出席。真普聯又委託該黨，九月八號星期日晏晝喺旺角行人專用區搞街頭諮詢會，蔡耀昌話到時會派多啲糾察維持秩序，避免混亂喎。