中環出更：設計博鰲標誌菁英險鬧笑話
香港菁英會每年一度省招牌嘅博鰲青年論壇（香港）大騷，將於下月九日喺會展開鑼，今屆聚焦「創意青年 創新亞洲：攜手共創美好未來」，構思夠晒新穎。為加添新鮮感，身兼論壇籌委會主席嘅菁英會主席梁宏正（Clarence）話，齋度論壇Logo已絞盡腦汁，大家一度想用「燈泡」，寓意思維「叮」一聲開竅，點知「燈泡」喺內地人眼中係「傻仔」咁解，差啲搞出大笑話。
放大鏡取代燈泡
「博鰲」開波在即，Clarence尋日拉埋一眾菁英兄弟姊妹，喺中環食晏打打氣。講起「燈泡的誤會」，Clarence話幸得高人提點，最後決定用巨型放大鏡做Logo，醒目又搶眼。「鋼鐵公主」陳寧寧、莊士集團太子女莊家蕙及信和集團都全力贊助，出錢又出力；而菁英會常務主席盧金榮就擔任論壇總指揮。幾忙都好，大家不忘發短訊恭賀香港青聯主席霍啟剛添丁，稍後會約啟剛擦餐勁慶祝。
講番論壇陣容，粒粒皆星，除咗靚仔影星張震、蘭桂坊之父盛智文、前中國銀監會主席劉明康，仲有故宮博物院院長單霽翔，組合多元化。菁英會創會主席施榮忻話，希望創造一個思想碰撞平台，等一眾領袖同青年人互相切蹉。不過，佢慨嘆上屆政府喺青年工作上力度不足，即使唔少青年智囊積極提出建設性意見，但都不獲重視，搞到青年問題積習太深，令今屆政府施政百上加斤喎。
卓妮
