打爛仔交嘅時候，有人插鼻，有人挖眼，已經令人覺得陰險到極啦。勢估唔到中國人陰險無極限，竟然真係活生生將一對眼球挖走，而且受害者係一個同人無怨無仇、天真無邪嘅小男孩。
呢一件令人髮指嘅事發生於山西省臨汾市，六歲小斌斌獨自喺屋外玩耍嘅時候，有個操外地口音嘅神秘女子將佢抱走，然後就有人用工具挖眼。此挖眼不同彼挖眼，爛仔打交嘅所謂挖眼，只不過令到對方嘅眼睛產生痛楚感覺咁解，挖眼之後眼睛依然健在。呢一個狠毒婆娘或者加上幾個喪心病狂嘅同黨，挖眼就好比挖泥，小斌斌眼眶留低兩個恐怖血洞。
為乜事咁殘忍挖眼呢？當地刑警展開地氈式搜索，最終尋回男童嘅一對眼球，不過眼角膜已經不翼而飛。所以絕對有理由相信，有人為咗要得到眼角膜轉賣圖利，不惜向小朋友狠下毒手。亦即係話，中國人變得愈來愈道德淪喪，見利忘義到咗一個超乎想像嘅程度。
小斌斌雖然瀕臨鬼門關而重返人世間，經過搶救之後再冇生命危險，不過從今以後雙目失明。根據家人嘅引述，小斌斌好淒涼咁問：「天為甚麼這麼黑？現在幾點了？怎麼就亮不起來呢？」
係囉，天點解咁黑？計功夫茶話齋，天之所以黑，因為人心黑，搞到成個神州都黑。假如炎黃子孫唔係咁黑心，有乜可能做出呢一種禽獸不如嘅冷血行為吖？
要數中國人嘅黑心行為，真係一日一夜都數唔完。大家記唔記得黑心磚窰事件呀？磚窰主人居然將小朋友捉去當作長期禁錮嘅奴隸，日以繼夜埋頭苦幹任勞任怨，食又食唔飽，穿又穿唔暖，到頭來連工資都冇呀！
黑心食品唔使多講啦，唔係坑渠油就係毒奶粉，國產奸商簡直係禍國殃民嘅人渣敗類。相比於挖眼圖利，有一種人更加可以稱之為魔鬼使者。即係咁，中國部分地區仍然殘留冥婚嘅陋習，有年輕男子死咗之後，家屬會要求搵個鬼新娘幫佢完婚。於是乎咯喎，魔鬼使者出動嘞，佢哋一係去盜墓掘屍，再唔係就索性搵個活生生嘅年輕女子一嘢殺死，活人變死人之後就係一件可供善價而沽嘅貨品，貨品種類叫做鬼新娘。慘遭殺害嘅女子，死咗都要受到盲婚啞嫁嘅不人道待遇。
唔知大家點睇，功夫茶覺得國家領導人嘅預言愈來愈接近現實。中國第五代執政者一上台就接二連三發出振聾啟聵嘅警告，唔反貪防腐就亡國亡黨。貪官受賄固然係腐敗嘅表現，陰險之徒挖眼圖利何嘗唔係腐敗呢？正所謂咯喎，國之將亡，必有妖孽，家陣妖孽無處不在，天又黑，心又黑，亡國河山一片黑！