政情：公民講場：亞洲會政總嘈生晒 莫乃光鬧爆ATV

通訊管理局裁定亞洲電視主要投資者王征干預電視台運作，違反發牌條件，向亞視罰款一百萬元及七日內終止盛品儒嘅執行董事職務。支持亞洲電視嘅亞洲會尋日拉隊到政府總部集會力撐亞視，準備執包袱嘅盛品儒自然成為主角，人多難免會人聲嘈雜。咁啱喺隔籬立法會辦公室工作嘅資訊科技界議員莫乃光似乎按捺不住，喺社交網站留言大呻樓下集會好嘈，認為啲人與其咁騎呢去爭取，點解唔正經做好啲節目呢？又話政府當然係針對亞視，而且針對得唔夠添，因為電視台做得唔好，與人無尤喎。