政情：存摺「出土」 項明生查數輸凸

塵封廿年 扣$4,000手續費

James執到錢梗係開心喇，點知有關銀行早已被中國銀行收購，若要查數就要畀每半年一百元，即合共四千元嘅手續費，仲未計咁多年嘅不動戶口服務費，所以早已「輸凸」。

James見財化水都覺得好肉赤，於是喺社交網站將慘痛經驗公諸於世，結果引起好大回響。有人話，早前發現父母亦有兩本紅簿仔，但喺戶口啲錢都係被銀行「自行處理」吞晒。話時話，可能好多公公婆婆都有類似遭遇，唔知銀行「沒收」人哋咁多錢，仲有冇商德㗎呢？

James咁大懵，皆因佢有幾個銀行戶口，又搬過幾次屋，嗰本擺喺櫃桶底嘅紅簿仔先至塵封咁多年。佢話，當年啱啱畢業工作一年多，月薪六千元，所以嗰四千元都唔係小數目。佢仲異想天開話，嗰本紅簿仔咁有歷史價值，中銀好應該回收做收藏，然後捐四千元畀慈善機構小母牛，咁就皆大歡喜喇！