通識科自○九年落實至今，社會仍議論紛紛。立法會議員梁美芬尋日接受電台電話訪問時，又再就呢個問題同學民思潮黃之鋒隔空舌戰，梁美芬要將通識科剔除於必修科，出席節目嘅黃之鋒就質疑梁美芬提出呢個建議嘅目的，總之就拗到面紅耳熱。梁美芬一怒之下，就話黃之鋒屈佢，期間仲叫「小朋友」聽清楚佢講嘢。黃之鋒被人當係小朋友，就梗係好不滿啦，所以梁美芬最後都改咗口叫番佢做黃之鋒同學。
不過，呢場舌戰並未有因為節目完咗而結束，仲多咗個「塘邊鶴」。話說白鴿黨立法會議員黃碧雲（一舊雲）喺尋日下午同傳媒茶敍時又主動提及事件，話梁美芬成立聯席會議時，認為通識科涉及太多政治問題，因而想變成學生自選科目，此舉係根本唔識乜嘢係政治，但係又成日吱吱喳喳，仲叫梁美芬返去再讀吓書添。
梁美芬亦不甘示弱，喺傍晚發聲明，重申自己對通識科嘅立場，強調唔想通識科被政治騎劫，而喺最後一段更針對一舊雲嘅說話作回應，質疑一舊雲講嘅嘢根本係一堆政治口號，內容自相矛盾、亳無實際，且不值一提喎。