政情：EQ唔知衰與「民」為敵
行政會議成員鄭耀棠同八位各黨派立法會議員，原本開開心心攜眷帶女參加國泰航空豪遊法國「收機團」，殊不知返港就知闖禍，備受各界批評，當中又以民建聯（民記）葛珮帆（EQ）「舔到盡」，偕老公提早一周走過德國先轉飛法國，兩人四張機票由國泰埋單。民記前晚開中委會時就檢討豪遊事件，EQ就死撐自己無錯，據聞仲將有份去豪遊嘅葉國謙（阿謙）擺上枱做擋箭牌，企圖甩身，確係上樑不正下樑歪。
聲稱出發前已徵詢譚Sir
據聞EQ喺中委會上話，佢喺「收機團」事件爆出之後已經想話自掏腰包捐錢，但就指阿謙率先企硬唔道歉、唔捐錢，搞到佢左右做人難，焗住要跟住大佬嘅立場喇。雖然會上嘅中委聽完解釋後冇再狙擊EQ，但部分中委喺會後不禁圍插EQ，暗批佢為求甩身，不惜擺阿謙上枱。有中委仲批評，EQ事後一直唔見影，枉黨主席譚耀宗（譚Sir）日前親自解畫，力撐佢同阿謙無違黨紀。
被指返港後「潛水」嘅EQ向我哋呻，澄清自己一直冇龜縮，仲解釋去程機票係國泰建議埋單，聲稱出發前已徵詢譚Sir意見，加上唔少黨派嘅「大佬級」議員都參加，估唔到佢眼中嘅「正常社交活動」都惹禍，感覺自己「中伏」喎！佢仲透露，上任後曾經獲國泰邀請去西雅圖同法國「收飛機」，但兩次都因為要返立法會開會而婉拒咗，估唔到今次撞啱休會，第一次參加就慘成箭靶。
黨紀寬鬆 貪曾都獲「特赦」
有中委認為，EQ應該有錯就認，甚至大可以「立法會新丁」唔熟規矩為由，望市民從輕發落。而其他肯回水嘅「團友」閒閒哋都捐五萬元贖罪，但EQ「跪低」後只肯補回德國飛法國嗰程機票，實在講唔過去。再者，白鴿黨班中委都譴責何俊仁同涂謹申兩名黨友參加「收機團」違反黨紀，一律交黨內中常委再審，但EQ自恃有人「照住」堅拒認錯，仲呼籲議員唔好「斬腳趾避沙蟲」拒絕商界一切邀請，否則了解唔到工商界嘅運作同意見喎，簡直係火上加油。
不過，民記黨紀咁寬鬆，連國泰贊助埋EQ飛德國程機票都冇被追究，唔怪得「貪曾」前特首曾蔭權爵士坐富豪贊助嘅豪華遊艇、私人飛機都獲民記特赦啦！