中環出更：名媛愛靚 飲好水有好報
水無色無味，仲有好水、壞水之分？著有暢銷書《好水》嘅世界知名鑑水師馬薩（Michael Mascha），早前來港主持一場天然礦泉水品嘗會，解構樽裝礦泉水嘅奧秘。莎莎化妝品老闆郭少明次女郭詩雅（Kitty）、前仁濟醫院主席嚴玉麟囡囡嚴紀雯（Carmen）及專業形象指導李玫玫（Angel）等城中靚女齊去捧場，事關飲啱水，對皮膚同健康影響好大，點可以等閒視之？
好少喺香港公開現身嘅Kitty，三年前被派到上海工作，現任莎莎中國業務拓展總監，佢話間唔中會返港見吓朋友同家人，今次特登同好友Angel嚟學嘢。Angel就話，早前佢介紹Kitty飲鹼性礦泉水，感覺好清新，皮膚都靚咗，所以今次為咗扮靚齊齊出動。
經常掛住甜美笑容嘅Carmen一早到場，為做天然鹼性水生意嘅好友仇曼瑩（Karen）打氣。Carmen啱啱喺港大畢業，依家喺一間地產公司做「新鮮人」。雖然佢爸爸盤電子生意食正智能手機條水，訂單接到手軟，但佢冇即刻返公司幫手，話要喺外面歷煉吓先。
配搭不同美食有驚喜
當日Karen同弟弟仇祖薰相當忙，事關佢哋喺黑龍江搞盤水生意，水質純淨得到飲遍天下好水嘅馬薩讚賞，令佢哋好鼓舞。佢哋嘅爸爸兼米芝蓮星級食肆新斗記老闆仇詩傑及太太Flavia，亦去幫手招呼賓客。馬薩話，十一年前佢因病而被迫戒酒，於是開始鑽研樽裝水，發現水具有獨特嘅奧妙。佢話以攝氏十三度品嘗礦泉水風味最佳，叫大家千祈咪加冰，若以唔同嘅水與美食配搭，驚喜與美酒不分伯仲喎！
卓妮