家和萬事興，家衰口不停，套用於現時嘅香港真係確切不過。唔係咩？香港最大嘅特色之一係爭拗不斷，唔係你鬧佢，就係佢鬧你，往往因為一件芝麻綠豆嘅小事而嘈到拆天。最佳例子莫過於小學教師辱罵警務人員嗰一宗鬧劇，導火線只不過有人講咗句粗口之嘛，居然發展到幾千人聚眾旺角齊齊罵街。更加諷刺嘅係，聚眾嘅其中一方以「反粗口入侵校園」作為出師之名，結果罵街現場粗口橫飛，粗鄙程度絕對兒童不宜。
家衰口不停嘅環境裏面，興盛嘅發展變得遙不可及，香港隨時被鄰近地區邊緣化。就以隔籬飯香嘅新加坡為例吖，呢一個長期競爭對手銳意發展航空業，而且大力改革住屋、教育、醫療、經濟、旅遊以及社會福利等等範疇。相反咯喎，香港社會爭拗不斷，弱勢政府舉步維艱，蹉跎歲月乜都停滯不前。
「東方報業民意調查」顯示，對於新加坡準備興建第四條機場跑道，香港嘅第三條跑道遲遲未見落實，五成受訪者歸咎於香港爭拗太多導致基建發展落後；兩成三擔心香港旅遊天堂嘅地位將會被取代；兩成二憂慮香港航空樞紐面對威脅。
喂喂喂，人哋新加坡確係家和萬事興o架，佢哋提出全民有樓嘅新目標，擴大並且增加購屋津貼資助，令民眾只需四年薪金就可以置業。身為香港嘅蝸居一族當然冇咁幸福啦，有唔少人終其一生都冇可能榮登業主行列，鬼叫樓價貴到冇譜！
關於雙城記嘅房屋政策對比，四成九受訪者直斥香港房策長期失衡，高樓價問題難以解決；兩成六認為香港欠缺長遠規劃，導致可行性低；一成五覺得香港房策失敗已經影響競爭力。
新界東北發展本來理論上可以開闢土地作為興建房屋之用，問題係本地罵街悍將一個二個死咬不放，主持房屋政策嘅高官又冇能力以懾人氣勢壓倒全場，反而發展局局長陳茂波萬箭穿心，被指控早於十九年前喺新界東北囤地自肥。高官一旦冇咗公信力，拓土建屋梗係一步一驚心啦。
至於醫療保障制度嘅改革，新加坡計劃將醫保全民化而且終身化，放寬及提高門診津貼，香港嘅醫療改革仍然紙上談兵處於諮詢階段咋。四成九受訪者不滿香港醫療改革進度緩慢；兩成六認為係特區政府欠缺承擔所致；兩成二狠批港產官僚無視醫療政策千瘡百孔。
順帶一提，香港人移民海外嘅數目忽然之間多咗百分之八，你估係乜嘢原因吖嗱？計功夫茶話齋，弱勢當家如果冇辦法改善家衰口不停嘅破敗，離家出走都係人之常情啫！