自從立法會議員及行會成員被揭發帶同家人隨國泰豪遊法國後，截至昨日為止，大部分參加者表明會「回水」，只有行會成員鄭耀棠同立法會議員葉國謙堅持無錯及拒絕「回水」。兩人中，鄭耀棠嘅行會成員係委任嘅，佢喺事件上完全唔使睇選民嘅眉頭眼額，唔擔心選民下次唔選佢。至於葉國謙，佢喺區議會功能組別當選，自己友數夠票就得，亦都唔使點理公眾嘅觀感，於是二人大模廝樣，實行攬住個荷包唔回水。所以話民主係一種監察，鄭、葉二人畀大家睇到，唔受選民監察嘅人，有一副點樣嘅面孔。
