正當唔少人都視歐美時裝為國際潮流指標，香港時裝設計師張路路就力撐本土文化。日前佢帶領一班青年參觀於歷史博物館舉行嘅清代宮廷服飾展覽時，有感而發咁話，好多時大家覺得中國好唔掂，其實全世界最叻嘅現代設計師，都一定會參考古代服飾以取得靈感。佢勉勵大家要以謙卑嘅心，多角度欣賞文化，豐富自己嘅內涵，並將好嘅傳統加以運用及發揮。
當日張路路主持咗一個創意工作坊，並充當展覽導賞員，為在場青年介紹宮廷服飾嘅設計同風格。佢話，雖然美感會隨住時代轉變，但自古以來嘅審美標準都係一樣，講求工整與平衡。佢透露，自己特別鍾意研究布料同花紋，首次參觀呢個展覽時，就花咗近兩個鐘，觀賞每件展品嘅手工同刺繡技巧。
張路路笑言，學生嘅表現甚有驚喜，譬如佢睇到件梅花鹿皮草時，側重留意工藝同梅花圖案，同學卻懂得分析剪裁同線條，成個專家咁款，確實令佢喜出望外。