政情：學術界拒接港府波
特首梁振英上任時聲言再冇黨派之分，而且要組成「香港營」，事隔一年多，聽聞除咗政界外，港府喺學術界都未能成功建立「香港營」，原因同今屆政府上任後，與學術界相處方式有關。有了解情況人士同我哋講，其中兩個主要原因係港府搵咗啲同學者溝通有困難嘅人嚟同學者溝通，同埋收番研究資助局嘅審批權，所以依家莫講泛民主派學者，連建制派及中立嘅人都唔想同港府行得咁埋喎。
政府通常會與學者保持溝通，咁至可以聽到較為中立嘅意見。不過有學術界中人最近就同我哋講，今屆政府有個現象，就係啲學者唔太想向政府建言，好重要嘅原因係今年年初，中央政策組喺冇諮詢下，突然收番研究資助局每年二千萬元嘅審批權，而往往學者又最重視得到別人嘅尊重，所以港府咁做已經破壞咗彼此嘅關係，喺學者心目中留下唔好印象。不過學術界中人話，呢次事件並唔係致命傷，另一個同樣重要嘅原因，係今屆政府根本搵唔到可以同學者溝通嘅人，協助築起橋樑。
邵善波張志剛 唔夠「同聲同氣」
據了解，呢屆政府由中央政策組首席顧問邵善波及行政會議成員張志剛同學者有較多嘅接觸，但始終佢哋唔係學者，關係一定無咁密切喇。而且，有部分學者唔希望同政府有任何關係，驚黐得太埋影響自己仕途，依家政府民望咁低，更難搵人同佢共患難，所以政府只可靠自己喎。
其實以往中策組都有搵真正嘅學者加入，喺首屆政府入面，就有曾擔任康乃爾醫學院臨床副教授嘅鄭維健做首席顧問，同期又搵嚟前科大商學院副院長練乙錚擔任全職顧問。之後嗰屆政府嘅中策組首席顧問劉兆佳本身就係一名學者。直至今屆政府，唔單止佢哋嘅首席顧問唔可以算為學者，連全職顧問都唔係學術界嘅專家，加上邵善波喺政界出名惹火，人哋想佢聽意見，佢就同人去辯論，所以政府想搵學者幫手諗計，都唔係咁易。