中環出更：陳振彬愛梅酒成箱買走
香港係美酒天堂，世界各地靚酒任君選擇，有人鍾意入口豐腴嘅洋酒，亦有人獨愛清甜嘅梅酒，識飲識食嘅觀塘區議會主席陳振彬（Bunny）就鍾愛後者。早前一個下午，卓妮喺中環ifc一間超市內，遇到Bunny一支公喺度選購梅酒，見佢試飲一輪之後，爽快買咗四、五支，離開時仲單手抱起成箱梅酒，莫非佢經常都一箱箱酒咁買，所以練得一手好臂力？
Bunny當日三點幾現身超市，佢嘅目標非常清晰，一個箭步就走到推廣日本酒嘅專櫃前，對住包裝精美嘅日本酒研究一番。專櫃服務員好殷勤咁招呼Bunny，向佢講解各種佳釀嘅特色，又倒出不同種類嘅靚酒畀佢試飲。Bunny恍如品酒專家，先將鼻子靠近酒杯，感受酒嘅香氣，再小呷一口慢慢嗒，然後先至徐徐吞下。
試過幾個牌子之後，Bunny最終揀定售價近二百元嘅梅酒，一口氣掃咗四、五支，然後推住購物車前往付款。待店員將梅酒放進紙箱內封好，佢即一手抱起紙箱，從容離開。
配打邊爐啱晒
卓妮問番Bunny，佢話佢一向都飲開呢隻梅酒，多數都係打邊爐時飲。佢仲教路話，將梅酒雪凍先至飲，同火鍋係絕配。Bunny仲話，除咗梅酒之外，以威士忌加冰嚟送火鍋都唔錯喎。雖然紅酒都係佢至愛，但就唔多適合用嚟配火鍋喇。
卓妮