【本報訊】非常父親自誇辣招教仔使得，旁人卻看不過眼，不少街坊同情溫童常捱餓罰企，紛紛暗地送上食物讓他充飢，有街坊甚至因日前給他送上汽水，恐他因此被逐出家門而自責。「一日都係我唔好，一定係我早幾日請佢飲可樂，畀佢老竇喺閉路電視睇到，所以搞到佢連罰企都冇得企，被人趕出街要瞓麥當勞咁陰功！」
街坊透露，溫氏一家在翠梓樓居住約十年，不少鄰居幾乎看着溫童長大，坦言：「就算想教好個仔，都唔使日日罰企、飯都唔畀佢食兼以粗口鬧吧？佢以為咁個仔就驚咗佢，成績好咗啲，但其實好傷小朋友嘅自尊心，對成長會留下陰影，而且小朋友處於發育年齡，成日吃不飽會唔夠營養，咁會影響成長健康o架！」另一名街坊則稱，據知已有社工曾跟進溫童狀況，而早前他曾給餅乾予他充飢，但他不敢接受，嘆謂：「近排睇見佢愈來愈瘦，真係好擔心！」
香港家庭及事業發展服務訓練總監司徒漢明稱，子女在成長過程中做錯事，若家長採用帶「侮辱性」或「傷害性」的「辣招」管教及處罰，不僅對事情無幫助，更會令子女身心受創，不僅會產生自卑感，日後更可能會以暴易暴。有社工建議家長採用溫和手法，如削減玩樂時間或罰做家務等，均可令子女反省過失，有需要可尋求專業人士協助。