政情：爆粗大狀馬恩國 恐墊「思」底
小學女教師林慧思爆粗辱警，掀起社會極大紛爭，最終觸發校方對佢作口頭警告以儆效尤。同樣喺大庭廣眾講咗句「You're not even a fxxking Chinese」嘅執業大律師馬恩國就坦言好驚，擔心原本前程似錦嘅大狀仕途，會受林慧思事件拖累而被迫斷送！
憂被殺一儆百釘牌
馬恩國二月喺立法會公聽會上失控爆粗，敵陣隨即乘機向大律師公會投訴佢，公會其後決定就事件進行紀律研訊。事隔數月，馬恩國並冇因為林慧思獲「輕判」而放下心頭大石，反而擔心事件引起社會公憤會燒埋佢嗰疊，加上案件冇先例可援，公會分分鐘為殺一儆百而決定加刑，所以判決「可以好嚴重」咁話。
至於大律師公會主席石永泰尋日出席活動時就對研訊一事相當口密，只係話公會一向唔對外公開研訊任何細節，假如投訴人同當事人唔講，研訊結果係點公眾無從得知。究竟最終譴責了事，抑或甚至被釘牌，睇怕馬恩國今鋪真係有得震、冇得瞓喇。