開講都有話，來說是非者，便是是非人。既然係咁，功夫茶強烈懷疑李銘澤係一個是非精。
李銘澤係乜水呢？佢就係前副廉政專員兼執行處首長，即係俗稱嘅廉署二哥，家陣已經係退休人士。李銘澤來說是非嘅方式係咁嘅，佢以個人名義喺報章撰文，認為特首梁振英嘅「道歉論」令廉署不必要地政治化，令人感覺不安咁話喎。至於梁振英嘅道歉論係乜東東呢？簡單咁講，有人向廉政公署投訴前行政會議成員林奮強偷步賣樓，經調查後認為案件缺乏足夠證據，林奮強得還清白之身，梁振英覺得投訴人應該向當事人道歉。
於是乎，是非精出場嘞。李銘澤發表嘅偉論係咁嘅，香港係言論自由地方，非政府人員尤其係政客，可以任意批評政府，肆無忌憚地把事情政治化，以達其個人或政治目的，而後果自負。但政府官員主動地將事情政治化，則不多見喎。佢仲話，廉署喺連串事件中一直噤若寒蟬，絕無表態，給人感覺係已跟隨當權者靠邊站，十分可悲喎。
呢嗱嗱嗱，大家係咪覺得有人無風起浪呢？係咪覺得有人唯恐天下不亂呢？李銘澤一方面話香港有言論自由，一方面又話某某人講嘅言論令廉署政治化，簡直就係煽風點火啦。
仲有喎，假如廉署唔係絕無表態，而係好似李銘澤咁樣發表偉論，大家認為後果會點樣吖嗱？唔使審啦，肯定會將呢一件事更加政治化，必然引起更加多七嘴八舌嘅是是非非，咁先至令到廉署及香港嘅未來可悲呀！
所以話啫，來說是非者，便是是非人，經過李銘澤煽風點火、搬弄是非之後，成件事反而變得更加政治化，嚴格而言應該咁講，道歉論被政治化。
計功夫茶話齋，廉署不嬲都係政治化嘅喇，李銘澤做官嘅時候「噤若寒蟬」，依家先至嚟扮正義，你話係咪虛偽吖？係咪無事生非吖？其實，廉署根本毋須理會呢一個已經退休嘅過氣二哥，只要秉公辦理做好本分就夠嘞。諷刺嘅係，廉署其中一項必須做好嘅本分係執掂李銘澤留低嘅爛攤子，你知啦，李銘澤未退休之前接手調查前特首曾蔭權爵士嘅貪腐案件，竟然查來查去查到夠鐘收工都未有結果喎。嗯，唔好怪功夫茶多疑，貪曾至今逍遙法外，會唔會係政治化造成嘅畸形現象呢？會唔會同李銘澤辦事不力有關呢？
點都好啦，是非精都有言論自由嘅，李銘澤道唔道歉自己決定啦。