政情：梁美芬丹麥巧遇伍廷芳後人
立法會議員梁美芬上月中參加母校中文大學搞嘅北歐郵輪遊，同老公城市大學法律教授王貴國喺十二日內暢遊北歐七國，據講民政事務局副局長許曉暉都係船上客。梁美芬喺尾站丹麥哥本哈根留多一日期間，仲湊巧撞到香港首位華人立法局議員伍廷芳嘅後人添！
梁美芬透露，佢喺哥本哈根難得「他鄉遇故知」，除咗喺香港做嘢嘅菲傭認得佢，連喺搵人幫手揸相機影相嗰陣仲遇啱同聲同氣嘅華人，傾落先知對方嘅先人係香港前立法局議員，仲係首位華人議員伍廷芳添。梁美芬話對方喺美國長大，喺當地做醫生，估唔到喺外地都遇到前輩嘅後人咁話。
自言旅程得到沉澱
除咗遊覽哥本哈根，佢哋一班中大舊生仲途經挪威奧斯陸、芬蘭赫爾辛基同瑞典斯德哥爾摩等北歐城市，而佢個人始終鍾情哥本哈根同奧斯陸，仲自言旅程除咗令成個人得到沉澱，亦反思咗好多嘢。唔怪得佢上月底返港後，面對下屬、香港家長聯會會長李偲嫣捲入教師林慧思嘅爆粗辱警風波時，都應付自如喇。