小學教師林慧思粗口辱警事件持續發酵，天主教香港教區前主教陳日君不滿特首梁振英（CY）要求教育局就事件提交報告，認為CY應被人粗口對待（粗口對待論）。之後陳日君疑似想文過飾非狡辯，但最終喺最新一期《公教報》靜雞雞認衰，親自撰文承認講過叫人用粗口鬧CY言論，但陳日君就死撐同真正鼓勵別人用粗口鬧CY係有距離，真係講都無人信啦！
CY要求教育局就林慧思事件提交報告令全城關注，陳日君早前接受傳媒訪問加入戰團「抽水」，批評CY做法過火，又突然爆出「離譜呀佢，你鬧佢粗口啦你，我支持你」嘅言論，自然引來各方嘩然。事隔兩日後，陳日君再接受訪問即時為「粗口對待論」消毒，強調教會絕非鼓勵說粗話，企圖可以蒙混過關。
雖然唔知教區有否就事件畀壓力陳日君，但陳日君就喺最新一期《公教報》認衰，辯稱「粗口對待論」只係隨便談話時「講笑咁講嘅」，承認呢啲說話講笑都不適宜，自行形容呢啲係「激氣話」喎，因此話佢真正鼓勵別人用粗口罵CY，其實係同真理頗有距離。照陳日君咁講，第時佢講完乜嘢都可以當冇講過，乜都佢講晒啦！