中環出更：麥建華博士 被當醫生問診
同醫學界好有緣嘅馬會事務執行總監麥建華（Kim），日前獲委任為醫院管理局檢討督導委員會成員，與官員同專家一齊幫呢隻病入膏肓嘅「大白象」把吓脈，睇吓有乜靈丹妙藥幫佢重拾健康。Kim係註冊土木工程師，但近年成日喺醫學界出沒，難免令人有混淆，早年喺英國參與醫療改革時，佢嘅博士（Dr.）銜頭仲被當係醫生添，成日被身體不適嘅朋友問診，認真搞笑。
工程師出身 Dr.惹誤會
睇番日前政府公布嘅醫管局檢討督導委員會成員名單，當中有醫生、教授，全部都係知名人士，身份最特別嘅係Kim，事關佢係工程師出身，其後轉型做管理工作。多年前佢到英國工作期間，更被獲邀加入公共醫療改革委員會。廿幾年前，香港醫管局成立時，佢都係委員會成員，依家仍然係醫管局人力資源委員會及職員上訴委員會成員，唔講仲以為佢係讀醫科出身添。
今次Kim又被委以重任，佢都忍唔住自爆當年喺英國參與醫療改革嘅尷尬事，事關博士同醫生嘅英文冇分別，好多委員若有身體不適就搵佢，佢解釋次數之多，連佢都數唔到喎！
卓妮