中環出更：富婆鄭張永珍過足購物癮
去年遊英國期間扭傷條腰嘅石油界「富婆」鄭張永珍，經過大半年休養後，近日已經回復狀態。日前一個下午，卓妮見到佢獨自現身中環太子大廈，先走入一間相熟時裝店，向店員打聽最新時裝情報，然後再到樓上一間超市開心掃貨，不出十五分鐘已經買咗一大籃食物，莫非佢有興致親自下廚？
當日下午三點幾鐘，一身高貴打扮嘅鄭張永珍獨自步進太子大廈，年過八十歲嘅佢，依然精神奕奕。佢先走進一間名牌時裝店，店員即時熱情上前招呼佢，但佢似乎唔係想購物，反而坐喺梳化上，同店員雞啄唔斷，莫非想聽吓今季有乜新款時裝？佢大約五分鐘後兩手空空離開。
超市「濕平」滿載歸
之後鄭太搭電梯上超市，推住架購物車，好滋油咁選購貨品。卓妮見佢第一時間到零食貨架，買咗一包大薯片，再到凍櫃買雞蛋、芝士同乳酪、一盒有機豆腐及冰鮮三文魚頭。唔通佢想煲三文魚頭豆腐湯？心情勁靚嘅鄭老太繼續掃貨，先買老抽、生抽同沙律醬各一支，再到沙律吧前，手指指揀心水蔬菜沙律，再過隔籬櫃買紅桑子及西蘭花。
買咁多嘢，埋單都只係六百多元，鄭太掏出「金牛」找數，然後挽住大袋「戰利品」離開。
卓妮問佢係咪想親自煮番幾味？佢笑稱只係貪得意買吓嘢，返屋企都係畀工人煮嘅。佢話自己身體已好好多，多謝關心喎，之後佢喺遮打道登上座駕離開。
卓妮