假如閣下家嘈屋閉，日日夜夜吵吵鬧鬧，你可能會產生一個想法，有朝一日離家出走就好嘞，不必受苦於喋喋不休嘅獅吼音波功。你知啦，家嘈屋閉損害聽覺神經嘅破壞性隨時高過地盤打樁，起碼打樁一到夜晚就收工，家衰口不停好可能同便利店一樣通宵營業年中無休，問你點頂。
即係咁，若然香港作為七百萬人嘅家，竟然出現家嘈屋閉嘅噪音滋擾，離家出走未嘗唔係人之常情。保安局數據顯示，今年首半年有三千九百個香港人移民海外，較去年同期增加百分之八，增加幅度不可謂不顯著。《華爾街日報》將數據引伸為一篇報道，指出香港回歸十幾年之後，移民再次出現攀升勢頭。
根據報道所講，過去一年有意移民嘅香港人增加一倍。打算移民嘅受訪者認為，離開香港嘅原因係對社會同政治氣氛感到擔憂，過去一年香港由於民主訴求以及政府企圖推行國民教育而出現兩極分化，多宗醜聞亦令到特首梁振英頭痛不已，好多高官被迫辭職。受訪者覺得香港嘅政治現況特別混亂，唔想下一代喺咁嘅環境長大，所以考慮移民。簡單咁講，香港家嘈屋閉，社會前景黯淡，經濟情況堪憂，想速速逃離老家嘅人愈來愈多。
計功夫茶話齋，政治現況特別混亂絕對係煩不勝煩嘅事實。舉個新鮮滾熱辣嘅現成例子吖，前特首曾蔭權爵士捲入貪腐醜聞已經令人厭惡，好衰唔衰猛烈批評貪曾嘅一眾政客又其身不正，最近被揭發有行政會議成員以及多名立法會議員接受航空公司邀請，免費去到法國以參觀飛機廠為名外遊玩樂。喂，如果係純粹公幹咁簡單，呢一班政客又點會攜眷同行咁過癮呢？成件事難免令人覺得公職人員假公濟私，偏偏佢哋又死口唔認喎，尤其係平日為反對而反對嘅泛民主派，竟然話攜眷接受航空公司款待完全冇問題。若然冇問題，當日唔好狂插前廉政專員湯顯明帶女朋友出席工作宴會吖，笨！
所以話啫，政客崇尚空言真係可以誤港殃民o架。正人君子痛打貪官污吏當然應該啦，之但係若然有偽君子以雙重標準嚴人寬己，廉潔奉公作為核心價值就會變得無所適從。假如貪曾同貪湯反戈一擊，以政客攜眷接受款待冇問題作為藉口為自己開脫，你話點算好呢？
移民再次出現攀升勢頭另一個主要原因係樓價太貴，有能力嘅中產階級寧願以相同嘅價錢去外國住大屋。嗱，如果港產官僚繼續空言誤港，房屋問題睇怕再過十年都冇辦法解決，到時咯喎，移民嘅人可能仲多吖！