政情：賣樓唔揸貨阿王有內幕？
長遠房屋策略督導委員會委員蔡涯棉日前預測本港樓價會喺下半年跌百分之五至八，但有業界人士仲悲觀，估計會跌超過一成。立法會議員個人利益申報資料顯示，已由新界西搬到港島區居住嘅工聯會議員王國興（阿王），早前沽出名下唯一一間屯門區物業，但遲遲未有喺港島買番間新樓，莫非身兼立法會房屋事務委員會主席嘅佢，聽到內幕消息話嚟緊樓價真係會大跌？
阿王話，早前賣樓同自己對樓市前景嘅睇法完全無關，而係純粹為咗兌現競選承諾，以及方便往返位於港島金鐘嘅立法會大樓工作喎。事緣出身港島東區區議員嘅阿王，喺○八年由勞工界功能界別改循新界西直選連任立法會議員後，覺得每日由港島區嘅屋企往返新西服務選民好唔方便，於是喺○九年索性賣出原有嘅北角區物業，舉家搬往新界西屯門區一個私人屋苑置業，做個真正嘅新西人。
暫住太太名下區內物業
去年工聯會為咗讓位畀麥美娟出選新界西，要求阿王第二次轉區，返番去港島區角逐連任，最後佢亦不負眾望再次成功當選，並承諾會重返港島居住，更貼身服務港島區選民。因此早前佢就兌現承諾，沽出咗屯門區嘅物業，暫時住喺佢太太名下嘅港島區單位。
阿王之前個屯門區單位都算係區內豪宅，喺○九年買入，今年賣出，四年間樓價應該升咗唔少。佢承認今次賣樓有賺錢，但自言無認真計算賺咗幾多，又話當年由北角搬往屯門係樓換樓，嚟緊亦有意重新喺港島區置業，高賣高買，賺來賺去都係帳面數字喎。問佢幾時會買得成？會重返東區置業定係揀住其他區？佢就話慢慢嚟、睇定啲先都未遲喎。從有關答案估計，阿王對嚟緊嘅樓市都係看淡居多。
傳拒退休 下屆繼續選
眾所周知，工聯會有意安排現任勞工界議員郭偉強，喺二○一六年取代阿王出戰港島區直選，但一手帶郭偉強出身嘅阿王好似唔想退休住，有人笑言佢下屆可以第三度轉區，參選工聯會仲未有議員嘅新界東或九龍西選區，延續佢嘅轉區不敗神話。如果真係咁，阿王就應該借嚟緊幾年跌市養尊處優，等樓價跌到谷底時，再喺新界東或九龍西執平貨重新置業。