政情：中環出更：賊匪重臨鐘錶界保安升級
上星期有酒店商場內嘅錶行店舖喺三分鐘內被狂賊掠奪幾百隻名錶，損失近千萬元，事件震驚整個鐘錶界。太子珠寶鐘錶主席鄧鉅明（Jimmy）同飛騰錶業品牌經理劉燊濤（Gary）講起行家呢單劫案時，都異口同聲話已即時檢討旗下店舖保安各個環節，全面提升保安戒備，當係食「驚風散」。
Jimmy話，當日佢睇新聞知道有錶行發生爆竊案時，佢即刻緊急召開會議，全面審視旗下分店保安程序，例如測試警鐘，又制訂更嚴謹嘅保安規矩，包括收舖後嚴格執行將名錶存放於夾萬，以免匪徒有機可乘。
測試警鐘 名錶存夾萬
Gary就話，當日佢哋亦即時檢討，由於旗下分店多數喺大型購物商場內，所以只要嚴守收舖後將錶收埋入夾萬，咁就冇咁驚喎。
從事鐘錶界廿幾年嘅Jimmy話，早幾年香港曾經劫案頻生，近年市面就平靜咗，的確令業界嘅保安警覺略有鬆懈。佢仲話，今次有關爆竊案之後，仲有幾宗打劫未遂案件發生，而且係集體犯案，顯示食「大茶飯」之風又起，好值得關注。
講番尋日活動，貿易發展局為全球最大嘅香港鐘表展搞宣傳騷，鐘錶界人士齊集，包括香港鐘表業總會副主席高鼎國及黃麗嫦、前主席朱繼陶夫婦、九龍表行第三代傳人黃雅芝及馮良記錶行太子女馮子琳等人。
鐘錶界老行尊孫秉樞亦有到場，佢見證鐘表展三十二年來嘅發展，最難忘當年香港未有大型嘅展覽場地，所以業界只能夠租用尖沙咀某酒店房間當作展場。佢好欣慰話，多年來鐘錶業一直穩佔本港出口嘅首位，係香港重要嘅經濟支柱，業界嘅努力值得肯定。
卓妮