放暑假，去旅行，如果目的地係法蘭西共和國，簡直係心曠神怡啦，事關法國情懷浪漫到暈，假如攜同心愛伴侶暢遊巴黎，絕對係賞心樂事。
之不過咁，若然公職人員以公幹名義假公濟私，遊覽法蘭西用嘅係私人機構免費送贈嘅商務客位機票，受惠者包括自己嘅家人，成件事就唔同講法嘞，賞心樂事隨時變惡心醜事。
呢，有八個不同黨派嘅行政會議成員及立法會議員，接受國泰航空公司款待，攜帶家眷免費把臂同遊法國六日，行程包括參觀空中巴士廠，當然唔少得嘅就係順便觀光遊覽。所謂觀光遊覽，除咗巴黎之外，仲有其他法國城市。
今次獲邀衝上雲霄嘅嘉賓包括行政會議成員鄭耀棠，民建聯嘅葉國謙同葛珮帆，民主黨嘅何俊仁同涂謹申，自由黨嘅鍾國斌，體育、演藝、文化及出版界議員馬逢國，以及會計界梁繼昌等等。
公職人員接受航空公司免費機票出埠旅行，算唔算利益衝突呢？回答呢個問題之前，大家不妨睇一睇前特首曾蔭權爵士，貪曾之所以醜聞纏身，正正就係接受富豪送贈嘅私人飛機入座款待，並且登上超級遊艇暢遊澳門。大家再睇睇前廉政專員湯顯明，其中一項令人髮指嘅行為係攜同女朋友出席以公帑埋單嘅工作宴會。
好嘞，再問多次，公職人員接受航空公司免費機票出埠旅行，算唔算利益衝突呢？受惠嘅當事人梗係耍手擰頭話唔算利益衝突啦，不過部分冇份去嘅立法會議員就有唔同意見，有人對事件感到震驚，認為相關議員應該盡快澄清。即係咁，參觀空中巴士廠可以話係公幹，不過家人同行咯喎，咁就唔同講法喇。正如有議員話齋，即使現時立法會有申報制度，但市民對公職人員操守嘅要求日漸提高，最適合嘅做法係婉拒邀請。
其實計功夫茶話齋，食政治飯嘅政客最擅長嘅就係雙重標準，一旦涉及利益衝突嘅係官僚或者政敵，佢哋往往死咬不放，萬一受到懷疑嘅係自己或者盟友，佢哋就若無其事。好似有份享受法蘭西之旅嘅何俊仁咁吖，佢話相關活動冇值得質疑嘅地方，回港後將向立法會申報，過去都有好多同僚參與類似活動喎。嗱，呢啲咪叫死撐囉！
簡單咁講，尊貴議員隔岸觀火嘅時候當然得理不饒人啦，一到自己火燒後欄就會死撐狡辯，冇事冇事，接受航空公司送贈機票完全不成問題。不如咁啦，現正被調查嘅貪曾及貪湯如果唔忿氣，一於向廉署舉報政客假公濟私，咁就好睇過大戲喇！