勞工及福利局政治助理莫宜端上月因照顧家中年幼子女請辭，前發展局政治助理何建宗亦於本月初因漏報家族公司利益辭職，港府霎時間失去兩名政治委任官員，要再填補有關空缺認真談何容易，因為有人話曾再三推薦人才，結果都係「食檸檬」，今次即使港府有心想再搵人填補，都未必會再咁落力推薦人才加入政府喇。
話說新政府上任之初有意為政治助理一職重新定位，有港府高層曾揚言需要三、四十名政助，希望各方幫手推薦人才，不過事後因港府五司十四局重組架構方案觸礁，政助一職嘅改革亦胎死腹中，建制派曾推薦嘅人才幾乎一一被打回頭，底因係部分問責局長對政黨中人有抗拒，搞到建制派中人都心中有氣。
仲有就係時移勢易，港府政治委任官員接連捲入風波醜聞後，建制派為免誤墮政治漩渦，大部分都同港府保持「安全距離」，所以政府要再搵合適人選填補空缺，相信只會係難上加難喇！