政情：陳智思話親戚多 唔選特首
被視為下屆特首熱門人選嘅行政會議成員陳智思（Bernard），近期再次活躍政圈，尋晚佢出席自由黨喺蘭桂坊舉辦嘅活動時，再次講明自己唔會選特首，但講到點化解香港深層次矛盾、點樣發展房屋政策時，Bernard又講得頭頭是道，好似發表緊政綱咁，話Bernard一啲準備都無，真係無人信。
喺老蘭酒吧，惟獨Bernard錫身以水代酒，仲借題發揮話自己身體唔好，又要照顧家庭，點可能選特首呢。佢仲話以現時政治氣氛，自己喺泰國有八十幾個親戚，都唔知邊個喺香港有投資，如果選特首，分分鐘被人挖到好多黑材料喎。
滿肚施政理念
雖然Bernard口講唔選特首，但佢都有一套施政理念，例如講到房屋土地政策，佢話其實香港唔係無地，原來全港只得百分之六土地用嚟起樓，但差唔多百分之六十係郊野公園、濕地，認為可以減少綠化地帶，諸如此類。呢啲說話咁熟口熟面，究竟係邊個講過？高智慧嘅讀者一定會估到。