政情：泛民內鬥潑真普聯冷水
由各泛民黨派組成嘅真普選聯盟，早前提出以「公民聯署」方式提名將來嘅普選特首候選人，講到好似一定要公民聯署機制先至算係真普選咁。不過有泛民「高人」就大潑真普聯冷水，指出要成功取得數萬名選民嘅個人資料同簽名，絕對係講易行難，只要將聯署人數定得高啲，就可以不費吹灰之力，技術性阻截泛民入閘。
呢位「高人」憶述，已故嘅民主黨元老司徒華，曾經喺九七回歸前發起過民間特首運動，希望攞到十萬個市民簽名支持佢做民間特首。當年華叔同協助佢嘅一班泛民盟友，搞咗幾個月，捱更抵夜，落足嘴頭，幾經辛苦先搵到足夠提名，原因係香港人向來着重私隱，唔係求其話支持民主就肯畀啲個人資料同簽名你。
企街一年都攞唔夠簽名
就算市民真心支持某位泛民候選人，願意冒住私隱外洩嘅風險畀資料，佢哋都要見到該位候選人嘅真身先會肯咁做，難以助選團代理。要任何人企喺條街度，見足幾萬名選民，握足幾萬次手攞簽名，隨時做足一年握到手爛都未夠數。
「高人」又指出，台灣係少數有奉行公民聯署制度嘅地方，當地嘅做法相當嚴謹，聯署人必須提供準確姓名、地址同身份證號碼，寫錯一隻字都會當無效，而且仲要提供埋身份證副本；其中親民黨嘅宋楚瑜，就曾經因為部分聯署被判無效而喪失參選總統資格，證明公民聯署並非如部分泛民想像中，有利少數黨或獨立人士參選。
高門檻 泛民勢望閘興嘆
對於有建制派批評公民聯署違反《基本法》，「高人」就建議大可扮晒大方咁接受公民聯署制度，但同時將聯署門檻定得略為高啲，例如要求最少有百分之三至五、即大約十萬至十七萬合資格選民聯署，而且仲要喺一、兩個月嘅提名期內取得，包保無一個泛民政黨可以做到。就算最後各泛民黨派肯團結一致，同心協力為某一位候選人搵到足夠聯署，呢位候選人亦肯定係中間溫和人士，只有少數選民支持嘅激進泛民同其他旨在攪局嘅「騎呢怪」，一定唔會入到閘。