中環出更：就職典禮獅兄獅姐話家常
全球最大嘅非政府組織（NGO）國際獅子總會，一向人多勢眾，其中包括六十八個屬會嘅中國港澳三○三區，早前舉行聯合就職典禮，逾千名獅兄獅姐匯聚。新任總監馮炳壽未來有排忙，佢話早幾年汶川地震時，佢藉賑災之便趁機將家族生意交畀囝囝，所以未來瞓身投入會務，完全冇問題。
馮炳壽亦係香港首支非牟利行山隊伍「行山樂」嘅永遠名譽會長，佢笑言已有逾廿年行山經驗，不過近年太忙，已好少約埋朋友一齊行。佢最鍾意行大帽山，每逢星期日早上就一支公獨行兩小時。吓？自己一人行山咪好悶？佢笑稱，同行仲有好多牛，至緊要可以吸收新鮮空氣，為身體充電。
前博愛醫院主席潘德明及總理李培都喺度，佢哋都係資深獅兄。本身做地產嘅潘德明話，三月底卸任博愛主席後，驚覺過去一年好多嘢未做，錢都搵少好多，所以四個月來密密出埠旅遊補番數，已經去咗日本沖繩及海南等地暢遊，仲話之後要發力搵錢喎！
文錦歡獲選國際理事
世運汽車集團主席羅少雄（Paul）成晚忙住迎賓，事關佢係第二副總監兼當晚典禮搞手之一，佢太太及兩位千金亦有去捧場。Paul好驕傲咁話，兩個囡囡讀書好叻，細女Stephanie更加年年考全級第一。Paul笑笑口話，自己「得把口」，但讀書成績就唔夠囡囡標青喇！
當晚焦點之一係慶賀前總監文錦歡（Teresa）獲選國際理事，成為首位女性華人躋身國際獅子總會最高決策層。出身澳門名門嘅Teresa話，佢加入獅子會逾廿年，未來將重點推動亞洲會務，宣揚獅子精神。