舊年十月一日國慶放煙花，係人都記得璀璨煙花之下樂極生悲嘅特大慘劇，南丫島撞船海難造成三十九人死亡，事後兩個船長被控以誤殺罪，手尾肯定長過水蛇春。根據死因庭嘅研判，海事處責無旁貸，事關驗船程序兒戲到極，若然出事兩隻船有足夠嘅安全設備，拯救工作可以有更多時間，遇難人數應該大大減少。
相撞嘅其中一隻船叫做南丫Ⅳ，海事處票控船東港燈違反牌照規定，事發當日冇足夠嘅船員當值。根據船隻嘅運作牌照以及驗船證明書列明，船上至少必須四名船員，不過證人嘅口供顯示，事發嘅時候船上只有三名船員，打麻雀都尚欠一隻腳。東區裁判法院裁判官唔接受港燈嘅抗辯講法，認為船上其他職員唔可以充當船員，因為呢啲職員只係協助乘客上落，冇接受過安全培訓，所以唔算係第四名船員。結果咯喎，法官裁定港燈罪名成立。
問題係，大家估下罪名成立嘅代價係乜嘢吖嗱？聽住喇，坐穩呀，竟然係罰款九百元咁大把！
法官話喎，按照法例最高罰款係一萬元，但根據案例今次判罰九百元。法官仲話，案件只考慮港燈違反有關嘅人數規定，冇證據顯示少咗一名船員會導致海難發生，所以不考慮兩者之間嘅關係。
係嘅，冇錯，船上少咗一名船員唔一定導致海難發生，就算你有足夠船員當值，都冇能力阻止船長發雞盲吖嘛。之不過咁喎，罰款區區九百元有乜嘢意義呢？雞碎咁多嘅罰款有阻嚇作用咩？假如功夫茶係船東，肯定會芳心竊喜暗中偷笑，一來損失九百元簡直不痛不癢，二來少個船員出糧已經除笨有精。功夫茶雖然唔知一個船員嘅正常月薪係幾多，但係憑常理推測，點都係九百元罰款嘅幾倍以上啦。
再講吖，就算法官按照法例判處最高罰款一萬元，阻嚇作用都唔係好大o架咋，對於一間營業額億億聲嘅大公司而言，絕對係九牛一毛，有罰同冇罰都係差不多。
即係咁，功夫茶非常懷疑相關法例嚴重過時，罰則同時代徹底脫節。打個譬喻吖，假如違例泊車嘅罰款係九元，功夫茶唔介意日日夜夜違例泊車囉，交罰款仲抵過泊入停車場啦，吓話！
船東違例嘅罰款少得咁交關，萬一引起其他船東有樣學樣，香港作為法治之區固然惹笑，最可怕嘅後果係安全成疑。喂，今次南丫海難就話未必同船上少咗一名船員有關啫，萬一下次有關點算好呢？船員有必要接受過安全培訓，意思就係話佢哋要負責保障乘客安全，少一個隨時唔得掂呀！