政情：公民講場：關注兒童得把口 廢鑊應做唔做

上任四個半月嘅平等機會委員會主席周一嶽（周一鑊）尋日接受立法會議員劉慧卿網台訪問，期間口口聲聲講到少數族裔兒童同殘障兒童嘅教育問題都係平機會重點工作，但就被卿姐質疑，點解佢唔出席聯合國九月召開嘅關於兒童權利嘅會議，係咪唔夠膽喺聯合國批評政府咁話。點知周一鑊就話，自己上任冇幾耐，唔會咁快去開國際會議，又話九月底會去中東出席人權論壇，唔想離開香港咁多喎。唔通周一鑊怕被人話佢好似「貪曾」前特首曾蔭權爵士咁藉公幹去遊埠？如果係咁諗，就真係好驚唔驚、應做唔做喇！