政情：立會又甩漏 議辦狂滲水
立法會新大樓入伙兩年來甩漏連連，幾乎成座大樓都被揭發出現問題，就算秘書處修修補補，甩漏都係無休止。尋日上晝港島區嘅一場驟雨，就再次暴露新大樓建築甩漏，事關當時竟然有雨水滲入議員辦公室，搞到啲職員要出動水桶盛載滴落嚟嘅雨水，「豆腐渣」三個字可謂當之無愧。
似小瀑布 毓民中招
今次肇事嘅係位於十樓嘅黃毓民辦公室，話說時值朝早十點幾鐘，有議辦職員發現議員房內近玻璃窗嘅天花位置出現滲水情況，雨水仲好似小型「瀑布」咁不斷流入辦公室，佢哋即時攞咗七個水桶出嚟載水，同埋致電秘書處投訴，好彩枱上文件同地下電線冇被滴濕。
秘書處派人調查肇事原因，發現原來天台當時正進行例行檢查同維修工程，所以先搞到啲雨水順住大樓玻璃流入下層嘅議員辦公室。雖然秘書處聲稱師傅已經修理完畢，但由於尋日下晝冇再落雨，所以係咪真係整番好，就要等到再落雨先至知喇。