政情：三民鬥攻大票倉
距離二○一五年區議會選舉仲有兩年多時間，但唔少政黨一早磨拳擦掌，放晒精銳兵力喺新選區上，希望藉此開拓版圖，好似剛剛落成、位於啟德嘅啟晴邨、德朗邨，由於估計人口最少達四萬人，預計會產生兩個新選區。聽聞三個「民」字頭政黨如民主黨（白鴿黨）、民建聯（民記）同民協已先後落區插旗，望住呢個大票倉，相信各黨一定出盡法寶鬥得你死我活，究竟邊個會係大贏家呢？
白鴿落區黨徽獻「細」
近年有唔少公屋落成，但啟晴邨、德朗邨之所以成為兵家必爭之地，係因為有高度戰略價值，兩大屋苑係近年罕見高度密集嘅大型公屋，票源集中，自然對選舉工程極為有利。據聞三個插旗政黨中，民記半年前已經落區收集居民資料，又派自己人成立衞星組織，希望全方位協助當區居民。最近該黨嘅九龍西一姐蔣麗芸更帶隊落區，搭帳篷設立諮詢站，做晒居民調查，唔知仲以為係地產經紀拉客。
至於白鴿黨亦不容忽視，近月已派出四名新人落區工作，組成「啟晴德朗工作隊伍」，四人主打幫助小業主成立業主立案法團，希望藉法律知識打入啟晴邨、德朗邨。由於工作隊伍將該黨標誌放得有咁細得咁細，消息話目前居民都幾受落，覺得四名後生仔女幫到手，莫非該黨都覺得自己黨個白鴿標誌冇公信力兼趕客？
免費上門驗樓招徠
要數最遲落區插旗嘅就係民協，但佢哋最明白公屋居民要乜，單憑一招「免費上門驗樓」，不停上門檢查有冇漏水。消息話由於最近成日打風落雨，民協就成為熱門求助對象，單憑一招就遲來先上岸。相信遲啲等多啲居民入伙後，幾大政黨競爭將愈來愈激烈。
大家可能會問，點解同樣靠攏基層嘅工聯會唔見影呢？原來都關選區劃界事，由於以上兩個新選區撥歸九龍西，眾所周知工聯會喺九龍西嘅地盤唔多，所以先至冇插旗，相反如果呢兩區撥入九龍東，估計九成都係佢哋囊中物，所以大家應該明白點解工聯會阿姐陳婉嫻早前為咗呢兩個新區唔劃入黃大仙區而嘈得咁緊要喇。