中環出更：別了熱廚房 黃靜文入「商」多自由
做咗政府二十幾年、前政制及內地事務局副局長黃靜文（Adeline）退出熱廚房一年後，上個月一日復出擔任中華廠商聯合會行政總裁。Adeline話本來諗住退休，但經過廠商會會長施榮懷多番游說下，終於決定出山。返咗工個半月左右，Adeline話最大唔同係做商會冇咁多掣肘。唔通以前佢喺政府入面，好多人阻頭阻勢？
「唔會有人阻你做嘢」
Adeline話，其實商會同政府都咁好做，但商會做嘢，所有商會會董都一條心為商會，所以冇咁多掣肘，仲話最大分別係「唔會有人阻你做嘢」，因為喺政府返工，唔止要顧及公眾觀感，連各政府部門嘅諗法都要考慮埋，既要顧慮會唔會被公眾鬧，亦要諗吓政府有冇人唔like。聽佢咁講，似乎佢依家抽到支好籤喎！
負責「獵頭」嘅施榮懷話，自從請到Adeline消息傳出後，即時收到幾十個電話，大部分人都好羨慕佢請到高手相助，佢就講笑咁講，話可能自己頭髮多啲，比較有吸引力，所以先至能夠從政府手上搶走Adeline。
卓妮