中環出更：巡視業務郭老太滿載歸
寓工作於娛樂，真係人生一大樂事，好似新鴻基地產大股東郭鄺肖卿（郭老太）日前就喺一群保安簇擁之下，現身集團旗下嘅荃灣廣場內一間百貨公司，好落力咁巡視零售業務，期間順便掃貨撐自己。店內嘅售貨員一見郭老太光臨，都好熱情咁招呼佢，氹到佢四萬咁口。
當日下午四點鐘，坐住輪椅嘅郭老太與員工及十幾名集團保安，浩浩蕩蕩咁到達荃灣廣場四樓嘅大型日式百貨公司。當時店內有唔少市民正在買餸預備晚飯，見到郭老太出巡咁大陣仗，不禁交頭接耳議論一番，「呢個乜嘢人嚟o架，咁架勢嘅？」亦有人認得佢係「嗰三兄弟嘅阿媽」。
掃出爐麵包西班牙火腿
一直保持微笑嘅郭老太睇落精神唔錯，佢喺眾人陪同下進入百貨公司，先光顧一間麵包店，指住剛剛出爐嘅麵包話：「啲包幾新鮮喎！」隨即細心選購咗十幾個麵包，由隨行員工付款。之後郭老太又到凍肉櫃前，聽完店員好詳盡咁介紹各款肉類後，就揀咗心愛嘅西班牙火腿，同時心郁郁望住隔籬凍櫃嘅和牛，開口問店員點賣。
不過，郭老太諗諗吓，至醒起自己唔識點煮和牛，結果都係冇買到，繼而轉往選購乾貨。郭老太喺百貨公司逗留咗近半個鐘，最後買到一袋二袋滿載而歸，由身邊員工幫手挽住離開。據知呢間百貨公司嘅舖位前身係經營咗多年嘅另一間連鎖日資百貨店，新地收回舖位後，並於今年六月底重新開設自己嘅日式百貨店，難怪郭老太咁緊張盤生意，山長水遠都要來巡視喇。
卓妮