政情:泛民新丁 代真普聯受靶

聲稱同其他「愛」字頭絕無關係嘅愛中港青年文化社團聯會,尋日又喺政府總部出面舉辦政制發展論壇,仲破天荒邀請到首位泛民代表出席。中港青社聯原本邀請咗真普選聯盟召集人鄭宇碩出席論壇,不過鄭宇碩去咗芬蘭無暇出席,於是改派公民黨新丁、大狀楊岳橋(Alvin)單刀赴會。

論壇本應探討本港政制何去何從,點知三位建制派講者對政改隻字不提,一開口就批評佔領中環行動破壞一國兩制。中港青社聯主席楊君豪指摘泛民依家好似「攞住個炸彈同中央談判」,大鬧真普聯係「佔中B隊」之餘,又話自己唔想見到抗爭場面,支持警方執行法紀。

被指騎劫論壇

睇住對家文不對題,Alvin多次試圖將討論主題拉番去政改,話只要政府盡快進行政改諮詢,得出一個全港市民可接受嘅方案,佔中就自然唔會發生。雖然Alvin講到口水都乾埋,但依然徒勞無功,仲畀人掉番轉頭話佢「騎劫」成場論壇。真普聯本身立立亂,搵個新丁去受靶真陰功。

第一手消息請下載on.cc東方互動iPhone/iPad/Android/Windows Phone Apps