中情局走佬特工斯諾登洩密事件令美國政府狼狽不堪，甚至搞到同俄羅斯關係緊張，兩國元首仲因此取消會面添。呢件事話畀大家知，說話可以亂講，機密唔可以亂洩。
功夫茶之所以舊事重提，皆因消防處又發生一單資料外洩醜聞，雖然性質同走佬特工唔同，但後果亦係好嚴重o架。件事係咁嘅，有位助理消防區長以私人手提電腦處理公務文件，早前呢部放喺家中嘅電腦畀人離奇「丟棄」，輾轉落到收買佬手中，收買佬打開電腦赫然發現內藏八百份消防內部文件，於是報警求助。據講文件內容涉及逾一千九百名市民、消防及其他政府人員，部分仲有身份證、干犯消防條例詳情等敏感嘅個人私隱添，你話係咪好嚴重吖？
消防處亦知道事態嚴重，聽聞管理層即時下令「封口」，企圖防止醜聞外揚。不過咁，紙又點包得住火吖，消防官僚欲想遮掩，愈顯得佢哋管理失職。
本來呢，消防內部指引規定屬員唔可以私下喺家中處理及儲存公務文件，而港府《保安規例》更加明確規定，除非為執行職務且經負責人員批准，否則保密文件不得從辦事處或檔案處取走。即係話，如果所有公務員都按指引及規定辦事，根本唔會一而再、再而三發生洩密事件。唔使問阿貴，今次呢位助理區長好明顯有違規之嫌，消防處又點樣處理呢？該處發言人聲稱，調查仍然進行緊，若證實有人違反訓令，會按既定機制處理喎。嗱，大家聽吓好嘞，港產官僚最鍾意官官相護，最後會唔會秉公處理，真係冇人知o架。
講開又講，政府部門資料外洩，今次只係冰山一角嘅咋。就講消防處吖，○九年「Foxy天王」透過分享軟件成功搜尋消防處六十份限閱及機密文件；今年三月，荃灣救護站遺失救護車出勤紀錄列印本，涉及一百六十名曾使用緊急救護車服務嘅傷病者個人資料。消防官僚將洩密視為閒事，完全當指引冇到，問你服未。
香港話就話有保障個人私隱嘅條例，仲專門設立咗私隱專員公署，可惜虛有其名，得個睇字。呢，本報日前踢爆內地多個網站透過地下渠道取得本港或內地網購單據，套取收貨人姓名、地址等個人資料，再賤賣出去，而私隱專員公署居然矇查查，旨意佢哋保護市民私隱喎，蚊都瞓蛇都死喇！
講番消防處本身，管理混亂，不務正業，烏煙瘴氣，醜聞多多，爆完一單又一單，鑊鑊新鮮鑊鑊甘，究竟消防官僚知唔知醜o架？究竟港府幾時至肯出手整頓o架？