近日不時有傳言話港府要打壓佔領中環行動（佔中），咁啱我哋又聽聞新民主同盟沙田區議員丘文俊因為工作報告呼籲市民參加佔中，而被區議會拒絕佢申領部分宣傳品實報實銷津貼，莫非反佔中嘅傳聞係真嘅？不過，據講其實係有關單張印咗新同盟嘅兩句口號，涉違反涉及宣傳政黨嘅規定，所以被拒申領津貼。
事緣丘文俊早前製作今年一月至七月嘅工作報告，結果被拒絕津貼其中兩頁，理由係該兩頁印有新同盟嘅「民生無小事，民主要堅持」嘅口號，因而涉及「宣傳政黨」。佢話，新同盟又冇攞專利，點可以因兩口號就話佢哋做宣傳，所以懷疑呢個只係政府反佔中嘅藉口。其實「民生無小事」呢句話，無論特首或部分政黨都成口掛喺口邊，莫非佢哋幫新同盟宣傳？
我哋向其他區議員查詢，對於能否在工作報告印埋所屬政黨徽號、標語或佔中議題，都冇一致講法。據講區議會規定議員宣傳品必須同區議會工作有關，否則有權拒絕發放津貼，一切以當局作準，區議員係好難捉摸咁話。不過，多個區議會都容許議員動議反佔中，咁點解又唔准喺工作報告講佔中呢？