政情：政策屢碰壁 陸恭蕙沖涼減壓
環境局副局長陸恭蕙（Christine）上任以來推行各項政策時偶爾會遇上阻力，佢尋日去上水出席一個閱讀分享活動時話，自己閒時除咗睇書外，都鐘意跑步減下壓，仲話三十幾歲嗰陣可以一日跑兩個鐘，但依家五十幾歲人就怕膝頭痛唔敢亂來，反而會返屋企沖涼瞓覺。佢話沖涼可以一併將煩惱沖走，而且好容易瞓着同熟睡，瞓醒就煩惱盡消喎。
Christine又推介一本名叫《蠅頭與鳥爪》嘅詩集，指中英對照嘅內容啱晒佢呢啲半唐番，又話入面好多故事都描寫「內心」，其中一個叫做「湯豆腐」嘅故事，講述一班食緊清湯煮豆腐嘅人忽發奇想，幻想以各種烹調方法配搭名貴食材煮豆腐，暗指人總是戀棧物慾同肉體嘅享受，但其實簡單以清湯煮豆腐更令人修心養性。
搬屋轉贈藏書夠環保
作為環局副局長，Christine臨尾亦不忘補充話自己唔會浪費書本，每次搬屋都將藏書轉贈，只保留有作者簽名同朋友送贈嘅書籍，對上一次搬屋就轉贈近三分一嘅書籍出去依家屋企剩下約四百本書。